मतमोजणी केंद्र परिसरात 4 जून रोजी प्रतिबंधात्मक आदेश लागू

 मतमोजणी केंद्र परिसरात 4 जून रोजी प्रतिबंधात्मक आदेश लागू

लातूर, दि. 29 (जिमाका) : भारत निवडणूक आयोगाने 16 मार्च, 2024 रोजी घोषित केलेल्या लोकसभा सार्वत्रिक निवडणूक कार्यक्रमानुसार 41- लातूर (अ.जा) लोकसभा मतदारसंघामध्ये 7 मे, 2024 रोजी मतदान झाले आहे. तसेच 4 जून, 2024 रोजी शासकीय निवासी महिला तंत्र निकेतन, बार्शी रोड, लातूर येथे सकाळी 8 पासून मतमोजणी होणार आहे. या मतमोजणी केंद्राच्या 200 मीटर परिसरात 4 जून 2024 रोजी फौजदारी प्रक्रिया संहिता 1973 चे कलम 144 प्रमाणे प्रतिबंधात्मक आदेश लागू करण्यात आले आहेत.

लातूर जिल्हाधिकारी तथा जिल्हादंडाधिकारी यांनी फौजदारी संहीता 1973 चे कलम 144 अन्वये लोकसभा सार्वत्रिक निवडणूक 2024 च्या अनुषंगाने शासकीय निवासी महिला तंत्रनिकेतन, बार्शी रोड, लातूर या मतमोजणी केंद्राच्या ठिकाणापासून 200 मीटरच्या परिसरामध्ये मंडपे, दुकाने उभारणे, तसेच मोबाईल फोन, कॉर्डलेस फोन, पेजर, वायरलेस सेट, ध्वनिक्षेपक व इतर सेट, ध्वनिक्षेपक व इतर इलेक्ट्रॉनिक्स उपकरणे बाळगण्यास प्रतिबंध केला आहे. तसेच निवडणूकीच्या कामाव्यतिरिक्त खाजगी वाहन, संबंधित पक्षाचे चिन्हाचे प्रदर्शन व निवडणूकीच्या कामा व्यक्तीरिक्त व्यक्तीस प्रवेश करण्यासाठी प्रतिबंध करण्यात आला आहे.

लातूर जिल्ह्यातील लोकसभा सार्वत्रिक निवडणूक -2024  मतमोजणीसाठी हा आदेश निवडणूकीचे कामे हाताळताना कायदा व सुव्यवस्थेचा प्रश्न निर्माण होवू नये, यासाठी 4 जून, 2024 रोजी मतमोजणी सुरु झाल्यापासून संपेपर्यंत अंमलात राहील, असे आदेशात नमूद करण्यात आले आहे.

*****