अण्णासाहेब पाटील आर्थिक मागास महामंडळाचा उपक्रम; तरुण उद्योजकांसाठी प्रशिक्षण आणि मेंटॉरशिप देणार
अण्णासाहेब पाटील आर्थिक मागास महामंडळाचा उपक्रम;
तरुण उद्योजकांसाठी प्रशिक्षण आणि मेंटॉरशिप देणार
लातूर, दि. 30 : आर्थिकदृष्ट्या मागासलेल्या तरुणांना सक्षम उद्योजक बनविण्यासाठी अण्णासाहेब पाटील आर्थिक मागास विकास महामंडळाने महत्त्वपूर्ण पाऊल उचलले आहे. महामंडळ आता केवळ बँक कर्जावरील व्याज परतावा योजनांपुरते मर्यादित न राहता, लाभार्थ्यांना व्यवसायासाठी आवश्यक प्रशिक्षण आणि मेंटॉरशिप प्रदान करणार आहे, अशी माहिती महामंडळाचे व्यवस्थापकीय संचालक विजयसिंह देशमुख यांनी दिली.
या उपक्रमांतर्गत 24 सप्टेंबर रोजी 'उद्योग सारथी' प्रशिक्षण कार्यक्रमातंर्गत ऑनलाइन वेबिनारचे आयोजन करण्यात आले. राज्यभरातील इच्छुक लाभार्थ्यांनी यात सहभाग घेतला. पुणे कृषी विद्यालयाचे प्रमुख शास्त्रज्ञ डॉ. सोमनाथ माने यांनी पशुपालन आणि दुग्धव्यवसाय या विषयावर मार्गदर्शन केले. हे वेबिनार यूट्यूब आणि फेसबुकवर लाइव्ह प्रसारित झाले.
डॉ. माने यांनी दुग्धव्यवसाय यशस्वी करण्यासाठी उत्तम जातीच्या गाई-म्हशींची निवड (गीर, साहिवाल, जर्सी), संतुलित आहार, आरोग्याची काळजी, लसीकरण, स्वच्छता, आर्थिक नियोजन, आणि आधुनिक तंत्रज्ञानाचा वापर याबाबत सविस्तर मार्गदर्शन केले. त्यांनी दुग्धव्यवसाय हा ग्रामीण अर्थव्यवस्थेला बळकटी देणारा महत्त्वाचा घटक असल्याचे नमूद केले.
वेबिनारला युवक, महिला उद्योजिका आणि स्वयंसहाय्यता गटांचे प्रतिनिधी ऑनलाइन उपस्थित होते. लाभार्थ्यांनी उपस्थित केलेल्या शंकांचे डॉ. माने यांनी निरसन केले. वेबिनारची सविस्तर माहिती महामंडळाच्या यूट्यूब चॅनेलवर उपलब्ध आहे. पुढील काळात विविध जिल्ह्यांमध्ये तज्ज्ञांमार्फत ऑनलाइन प्रशिक्षण कार्यशाळांचे आयोजन होणार आहे. यामुळे महामंडळाच्या लाभार्थ्यांचे व्यवसाय वृद्धिंगत होण्यास मदत होईल, असे मत श्री. देशमुख यांनी व्यक्त केले.
****
Comments
Post a Comment