वार्षिक उद्योग पाहणी अंतर्गत उद्योगांनी आपली माहिती देवून शासनास सहकार्य करावे - अर्थ व सांख्यिकी संचालनालय संचालक विजय आहेर यांचे आवाहन

 

वार्षिक उद्योग पाहणी अंतर्गत उद्योगांनी आपली

माहिती देवून शासनास सहकार्य करावे

           - अर्थ व सांख्यिकी संचालनालय संचालक विजय आहेर यांचे आवाहन

 

लातूर,दि.25(जिमाका):-  वार्षिक उद्योग पाहणी अंतर्गत उद्योगांनी माहिती देण्यासाठी सहकार्य करुन देशाच्या व राज्याच्या उद्योग क्षेत्राच्या वाढीच्या निर्देशांकाला आपला हातभार लावावा असे अर्थ व सांख्यिकी संचालनालय संचालक विजय आहेर यांनी आवाहन केले.

विविध क्षेत्रातून संकलित करण्यात येणाऱ्या माहितीची गुणवत्ता वाढविण्यासाठी व त्या त्या क्षेत्रातील कामाचा दर्जा उंचाविण्याच्या द‌ृष्टीकोनातून सन 2021-22 या वर्षासाठी राज्यातील क्षेत्रीय अधिकाऱ्यांची दि. 19 ते 21 एप्रिल, 2023 या कालावधीत तीन दिवसीय कार्यशाळा नियोजन विभागाच्या अधिनस्त अर्थ व सांख्यिकी संचालनालय, मुंबईतर्फे यशदा, पुणे येथे आयोजित करण्यात आली होती.

या कार्यशाळेच्या उद्घाटन कार्यक्रमाचे अध्यक्षस्थानी यशदाचे महासंचालक एस. चोकलिंगम (भा.प्र.से.) व प्रमुख पाहूणे म्हणून राष्ट्रीय सांख्यिकी कार्यालय, कोलकाताचे  औद्योगिक सांख्यिकी विभागाच्या उपमहानिदेशक सौम्या चक्रवर्ती, राष्ट्रीय नमूना पाहणी विभागाच्या पुणे येथील क्षेत्रीय कार्यालयाचे संचालक आलोककुमार, उद्योग विभागाचे प्रतिनिधी जिल्हा उद्योग केंद्र, पुणे महाव्यवस्थापक पी.डी.रेंदाळकर, अर्थ व सांख्यिकी संचालनालयाचे संचालक विजय आहेर हे व्यासपीठावर उपस्थित होते.

राज्यातील प्रादेशिक सांख्यिकी कार्यालयांचे सहसंचालक कि.प्र .गिरगांवकर, व जिल्हा सांख्यिकी कार्यालयाचे उपसंचालक उ.म.हत्ते आणि क्षेत्रकाम करणारे कर्मचारी या कार्यशाळेत उपस्थित होते असे एकूण 164 अधिकारी व कर्मचारी या कार्यशाळेत सहभागी झाले होते.

वार्षिक उद्योग पाहणी (Annual Survey of Industries) हा उद्योगविषयक (संघटित क्षेत्र) महत्वपूर्ण आकडेवारीचा प्रमुख स्त्रोत आहेत. या आकडेवारीचा वापर राष्ट्रीय उत्पन्न अंदाज (GDP) तयार करण्यासाठी, औद्योगिक संरचनेचा अभ्यास करण्यासाठी व उद्योगविषयक धोरणे निश्चितीसाठी होतो.

राष्ट्रीय स्तरावर सांख्यिकी कार्यालयाकडून देशातील सर्व राज्यांमधील प्रमुख उद्योगांच्या वार्षिक उद्योग पाहणीचे काम करण्यात येते तर राज्यातील उद्योग पाहणीचे काम अर्थ व सांख्यिकी संचालनालय या राज्य शासनाच्या सांख्यिकी विषयक नोडल यंत्रणेकडून करण्यात येत असून निवड करण्यात आलेल्या उद्योगांना सांख्यिकी संग्रहण अधिनियम 2008 खालील तरतुदींनुसार माहिती देणे बंधनकारक आहे.

भारत सरकार राष्ट्रीय सांख्यिकी कार्यालय उपमहानिदेशक सौम्या चक्रवर्ती यांनी जगात बहुतांश देशांमध्ये वार्षिक उद्योग पाहणी घेण्यात येत असल्याचे सांगून आपल्या देशातील वार्षिक उद्योग पाहणीमध्ये सर्वात अधिक उद्योगांची पाहणी केली जात असल्याची अभिमानास्पद बाब नमूद केली व माहिती विहीत वेळेत संकलित करुन उपलब्ध करुन देण्याचे महत्व अधोरेखित केले.

अर्थ व सांख्यिकी संचालनालयाचे संचालक विजय आहेर यांनी या प्रशिक्षणाचा पुरेपुर लाभ घ्यावा व जरी मनुष्यबळाची कमतरता असली तरी कामाचे योग्य नियोजन करुन शासनासाठी व उद्योग क्षेत्रासाठी महत्वाची असलेली माहिती या पाहणीच्या माध्यमातून वेळेत व गुणवत्तापुर्ण उपलब्ध करुन देणेच्या दृष्टीने कार्यवाही करण्याच्या सूचना दिल्या तसेच उद्योगांनी देखिल या कामी आवश्यक ते सहकार्य करावे असे आवाहन केले.

यशदाचे महासंचालक चोकलिंगम यांनी देशातील सर्व्हेचा इतिहास, माहितीचे महत्व आणि त्याचा वापर आणि त्यामुळे होणारे अपेक्षित/अनपेक्षित परिणाम याबाबत उदाहरणांसह अतिशय रंजक पद्धतीने उपस्थितांच्या ज्ञानात भर घातली. माहिती तंत्रज्ञानात होत असलेल्या नवनवीन प्रगतीद्वारे उपलब्ध होत असलेले आर्टिफिशियल इंटेलिजन्स व मशीन लर्निंग यासारखे तंत्रज्ञान याचा विचार करुन माहिती संकलनाच्या पद्धतीमध्ये देखिल सुधारणा होण्याच्या दृष्टीने विचार करण्याची आवश्यकता प्रतिपादन केली. वार्षिक उद्योग पाहणीच्या कामासाठी शुभेच्छा दिल्या.

कार्यक्रमाच्या प्रास्ताविकात अर्थ व सांख्यिकी संचालनालयाचे  उपसंचालक श्रीमती दिपाली धावरे यांनी वार्षिक उद्योग पाहणीबाबत सर्व उपस्थितांना अवगत केले.

अर्थ व सांख्यिकी संचालनालयाचे सहसंचालक नवेन्दु फिरके यांनी उद्घाटनाच्या कार्यक्रमासाठी उपस्थित मान्यवरांचे व सर्व उपस्थितांचे आभार मानले.

कार्यशाळेमध्ये  रणबीर डे व बाप्पा करमरकर, उपसंचालक, राष्ट्रीय सांख्यिकी कार्यालय, भारत सरकार कोलकाता, प्रख्यात अर्थतज्ञ व प्राध्यापक डॉ.प्रदिप आपटे, गोखले अर्थशास्त्र संस्था, पुणे राष्ट्रीय नमुना पाहणी कार्यालयाच्या पुणे येथील क्षेत्रीय कार्यालयाचे उपसंचालक श्रीनिवास शिर्के आणि श्री.महेश चोरघडे यांनी मार्गदर्शन केले.

कार्यशाळेच्या दुसऱ्या दिवशी डॉ.जितेंद्र चौधरी, अपर संचालक, अर्थ व सांख्यिकी संचालनालय हे सत्र नियंत्रक व तज्ञ मार्गदर्शक म्हणून उपस्थित होते. अर्थ व सांख्यिकी संचालनालयाच्या संबंधित अनुभवी प्रशिक्षकांद्वारे वार्षिक उद्योग पाहणीच्या कामाचे प्रात्यक्षिकासह प्रशिक्षण संगणकावर घेण्यात आले व प्रशिक्षणार्थींच्या अडचणींचे निराकरण करण्यात आले. कार्यशाळेच्या समारोपाच्या कार्यक्रमासाठी डॉ.मल्लीनाथ कलशेट्टी (भा.प्र.से.), उपमहानिदेशक, यशदा, पुणे हे अध्यक्ष व श्री.पुष्कर भगूरकर, अपर संचालक, अर्थ व सांख्यिकी संचालनालय हे प्रमुख पाहुणे म्हणून उपस्थित होते .आभार प्रदर्शनाने कार्यशाळेची सांगता झाली.

                                            ***