उच्च माध्यमिक प्रमाणपत्र पुरवणी परीक्षेसाठी विलंब शुल्कासह ऑनलाईन अर्ज करण्याची सुविधा उपलब्ध

 उच्च माध्यमिक प्रमाणपत्र पुरवणी परीक्षेसाठी विलंब शुल्कासह ऑनलाईन अर्ज करण्याची सुविधा उपलब्ध

*लातूर,दि.12,(जिमाका):   उच्च माध्यमिक प्रमाणपत्र (इयत्ता दहावी) फेब्रुवारी – मार्च -2024 परीक्षेचा निकाल दिनांक 21 मे, 2024 रोजी ऑनलाईन जाहीर झालेला असून महाराष्ट्र राज्य माध्यमिक व उच्च माध्यमिक शिक्षण मंडळातर्फे पुरवणी परीक्षा जुले-ऑगस्ट, 2024 मध्ये घेण्यात येणार आहे. उच्च माध्यमिक प्रमाणपत्र (इयत्ता बारावी) परीक्षेस पुनर्परिक्षार्थी, यापूर्वी नाव नोंदणी प्रमाणपत्र प्राप्त झालेले खाजगी विद्यार्थी तसेच श्रेणीसुधार योजनेतंर्गत व तुरळक विषय घेवून प्रविष्ट होणार विद्यार्थी, आयटीआय विषय घेवून प्रविष्ट होणाऱ्या विद्यार्थ्यांची आवेदनपत्रे (औद्योगिक प्रशिक्षण संस्थेद्वारे ट्रान्सफर क्रेडिट घेणारे विद्यार्थी) ऑनलाईन पध्दतीने विलंब शुल्काने www.mahahsscbord.in या संकेतस्थळावर भरण्यासाठी 17 जून 2024 पर्यंत मुदतवाढ देण्यात आली आहे. 

उच्च माध्यमिक शाळा, कनिष्ठ महाविद्यालय यांना बँकेत चलनाद्वारे शुल्क भरण्यास 20 जून, 2024 पर्यंत मुदत राहणार आहे. उच्च माध्यमिक शाळा, कनिष्ठ महाविद्यालयांनी विभागीय मंडळाकडे 24 जून, 2024 पर्यंत शुल्क भरल्याच्या चलनासह  विद्यार्थी याद्या जमा कराव्यात. या परीक्षेची आवेदनपत्रे ही ऑनलाईन पध्दतीने स्वीकरण्यात येणार असल्याने विद्यार्थ्यांनी जुलै-ऑगस्ट, 2024 मध्ये होणाऱ्या परीक्षेची आवेदनपपत्रे त्यांच्या उच्च माध्यमिक शाळा, कनिष्ठ महाविद्यालयामार्फतच भरावी. ऑनलाईन आवेदनपत्र भरतांना फेब्रुवारी – मार्च, 2024 परीक्षेत अनुत्तीर्ण झालेल्या विद्यार्थ्यांना त्यांची या परीक्षेतील माहिती आवेदनपत्रात ऑनलाईन घेता येईल. श्रेणीसुधार विद्यार्थ्यासाठी जुलै-ऑगस्ट, 2024 व फेब्रुवारी –मार्च, 2025 अशा लगतच्या दोनच संधी उपलब्ध राहतील. सर्व विभागीय मंडळातील उच्च माध्यमिक शाळा, कनिष्ठ महाविद्यालयांनी निर्धारित शुल्क मंडळाने निश्चित केलेल्या बँकेच्या खात्यामध्ये जमा करुन चलनाची प्रत व विद्यार्थ्यांच्या याद्या दिलेल्या मुदतीतच विभागीय मंडळाकडे सादर कराव्यात. आवेदनपत्रे ऑनलाईन पध्दतीने सादर करावयाच्या तारखांमध्ये कोणतीही मुदतवाढ देण्यात येणार नाही, महाराष्ट्र राज्य माध्यमिक व उच्च माध्यमिक शिक्षण मंडळामार्फत कळविण्यात आले आहे.