उत्कृष्ट ग्रंथालय पुरस्कारासाठी २५ सप्टेंबरपर्यंत प्रस्ताव सादर करण्याचे आवाहन
उत्कृष्ट ग्रंथालय पुरस्कारासाठी २५ सप्टेंबरपर्यंत
प्रस्ताव सादर करण्याचे आवाहन
लातूर, दि. १३ (जिमाका) : सन २०२५-२६ या वर्षासाठीच्या भारतरत्न डॉ. बाबासाहेब आंबेडकर उत्कृष्ट ग्रंथालय पुरस्कार तसेच डॉ. एस. आर. रंगनाथन उत्कृष्ट ग्रंथालय कार्यकर्ता व सेवक (ग्रंथमित्र) पुरस्कारासाठी इच्छुक ग्रंथालये, कार्यकर्ते व सेवकांनी २५ सप्टेंबर २०२६ पर्यंत प्रस्ताव सादर करावेत, असे आवाहन ग्रंथालय संचालनालयाचे प्रभारी ग्रंथालय संचालक अशोक मा. गाडेकर यांनी केले आहे.
महाराष्ट्र शासनाच्या उच्च व तंत्र शिक्षण विभागांतर्गत ग्रंथालय संचालनालयामार्फत राज्यातील शासनमान्य सार्वजनिक ग्रंथालयांचा गुणात्मक विकास, नागरिकांना उत्तम ग्रंथालयीन सेवा आणि वाचन संस्कृतीला प्रोत्साहन देण्यासाठी हे पुरस्कार दिले जातात.
शहरी व ग्रामीण विभागातील अ, ब, क आणि ड वर्गातील उत्कृष्ट शासनमान्य सार्वजनिक ग्रंथालयांना अनुक्रमे १ लाख, ७५ हजार, ५० हजार आणि २५ हजार रुपये रोख पुरस्कार दिला जातो. यासोबत सन्मानचिन्ह, प्रमाणपत्र आणि ग्रंथभेट देऊन गौरविण्यात येते.
सन २०२५-२६ च्या पुरस्कारासाठी इच्छुक ग्रंथालये, ग्रंथालय चळवळीतील कार्यकर्ते व सेवकांनी विहित नमुन्यातील प्रस्ताव आवश्यक कागदपत्रांसह तीन प्रतींमध्ये विहित मुदतीत संबधित जिल्हा ग्रंथालय अधिकारी कार्यालयाकडे सादर करावेत, असेही श्री. गाडेकर यांनी कळवले आहे.
****
Comments
Post a Comment