मॅट्रिकपूर्व शिष्यवृत्तीसाठीची ऑनलाइन अर्ज प्रक्रिया महाडीबीटी पोर्टलवर सुरू
मॅट्रिकपूर्व शिष्यवृत्तीसाठीची ऑनलाइन
अर्ज प्रक्रिया महाडीबीटी पोर्टलवर सुरू
लातूर, दि. 5 (जिमाका) : सामाजिक न्याय व विशेष सहाय्य विभागांतर्गत जिल्हा परिषदेच्या समाज कल्याण विभागाकडून अनुसूचित जाती (एससी) प्रवर्गातील विद्यार्थ्यांसाठी विविध मॅट्रिकपूर्व शिष्यवृत्ती योजना राबविण्यात येतात. यासाठीची 2026-27 ची अर्ज प्रक्रिया महाडीबीटी 2.0 पोर्टलवर सुरू झाल्याचे जिल्हा समाज कल्याण अधिकारी यादव गायकवाड यांनी सांगितले.
नववी व दहावीतील विद्यार्थ्यांसाठी मॅट्रिकपूर्व शिष्यवृत्ती (केंद्रपुरस्कृत), साफसफाई व आरोग्यास धोकादायक क्षेत्रात काम करणाऱ्या पालकांच्या पाल्यांसाठी मॅट्रिकपूर्व शिष्यवृत्ती, पाचवी ते सातवी व आठवी ते दहावीतील मुलींसाठी सावित्रीबाई फुले शिष्यवृत्ती, माध्यमिक शाळांतील विद्यार्थ्यांसाठी गुणवत्ता शिष्यवृत्ती तसेच महर्षी विठ्ठल रामजी शिंदे शिक्षण शुल्क व परीक्षा शुल्क योजना यांचा समावेश आहे.
अनुसूचित जाती प्रवर्गातील जिल्ह्यातील पात्र विद्यार्थ्यांनी पोर्टलवर ऑनलाइन अर्ज करावेत. पालक व सर्व शाळांच्या मुख्याध्यापकांनी विद्यार्थ्यांना अर्ज प्रक्रियेसाठी सहकार्य करावे, असे आवाहनही गायकवाड यांनी केले आहे.
***
Comments
Post a Comment