मद्यविक्री अनुज्ञप्ती सुरु ठेवण्याच्या कालावधीत 31 डिसेंबर रोजी शिथिलता

 

मद्यविक्री अनुज्ञप्ती सुरु ठेवण्याच्या

कालावधीत 31 डिसेंबर रोजी शिथिलता

लातूर, दि. 26 (जिमाका) : नववर्षानिमित्त 31 डिसेंबर 2022 रोजी राज्यातील एफएल-2 (विदेशी मद्य किरकोळ विक्री दुकान), एफएल-3 (परवाना कक्ष), सीएल-3, एफएलबीआर-2 (बंद बाटलीतून बिअर विक्री), एफएल-4 (क्लब अनुज्ञप्ती) आदी अनुज्ञप्त्यांच्या आस्थापना अधिक कालावधीसाठी सुरु राहतील. यासाठी मुंबई दारूबंदी कायदा 1949 चे कलम 139 (1) (सी) व कलम 143 (2)(एच-1)(iv) अन्वये शासनाने शिथिलता दिली आहे.

एफएल-2 (विदेशी मद्य किरकोळ विक्री दुकान) अनुज्ञप्ती 31 डिसेंबर रोजी रात्री साडेदहा ते दुसऱ्या दिवशी पहाटे एक वाजेपर्यंत, एफएल-3 (परवाना कक्ष) अनुज्ञप्ती पोलीस आयुक्तालयाच्या परिक्षेत्राच्या व्यतिरिक्त रात्री साडेअकरा ते दुसऱ्या दिवशी पहाटे पाच वाजेपर्यंत आणि पोलीस आयुक्तालयाच्या परिक्षेत्रासाठी दीड ते पहाटे पाच वाजेपर्यंत शिथिलता देण्यात आली आहे. सीएल-3 अनुज्ञप्ती 31 डिसेंबर रोजी महानगरपालिका तसेच ‘अ’ व ‘ब’ वर्ग नगरपालिका क्षेत्रात रात्री अकरा ते दुसऱ्या दिवशी पहाटे एक वाजेपर्यंत आणि इतर ठिकाणी रात्री दहा ते दुसऱ्या दिवशी पहाटे एक वाजेपर्यंत सुरु ठेवण्यास शिथिलता देण्यात आली आहे.

एफएलबीआर-2 (बंद बाटलीतून बिअर विक्री) अनुज्ञप्ती 31 डिसेंबर रोजी रात्री साडेदहा ते दुसऱ्या दिवशी पहाटे एक वाजेपर्यंत, एफएल-4 (क्लब अनुज्ञप्ती) पोलीस आयुक्तालयाच्या परिक्षेत्राव्यतिरिक्त रात्री साडेअकरा ते दुसऱ्या दिवशी पहाटे पाच वाजेपर्यंत आणि पोलीस आयुक्तालयाच्या परिक्षेत्रासाठी दीड ते पाच वाजेपर्यंत शिथिलता देण्यात आली आहे.

*****