लातूर जिल्हा परिषद अध्यक्ष पदासाठी १६ मार्च रोजी, सर्व पंचायत समित्यांच्या सभापती पदांसाठी ९ मार्च रोजी निवडणूक

लातूर जिल्हा परिषद अध्यक्ष पदासाठी १६ मार्च रोजी, सर्व पंचायत समित्यांच्या सभापती पदांसाठी ९ मार्च रोजी निवडणूक लातूर, दि. ५ : महाराष्ट्र जिल्हा परिषद आणि पंचायत समित्या अधिनियम, १९६१ च्या कलम ११(१) आणि ५९(१) नुसार, सार्वत्रिक निवडणुकीत निवडून आलेल्या सदस्यांचा कार्यकाळ पहिल्या बैठकीपासून सुरू होतो. जिल्हाधिकाऱ्यांच्या आदेशानुसार लातूर जिल्हा परिषद आणि पंचायत समित्यांची पहिली बैठक २० मार्च २०२६ पूर्वी आयोजित करण्यात येणार आहे. याअनुषंगाने लातूर जिल्हा परिषदेचे अध्यक्ष आणि उपाध्यक्ष पदांची निवड १६ मार्च २०२६ रोजी दुपारी २ वाजता होणार आहे. तसेच, लातूर जिल्ह्यातील सर्व पंचायत समित्यांच्या सभापती आणि उपसभापती पदांची निवडणूक ९ मार्च २०२६ रोजी दुपारी २ वाजता होणार आहे. लातूर जिल्हा परिषदेचे अध्यक्ष आणि उपाध्यक्ष पदांची निवडणूक प्रक्रिया जिल्हा परिषदेच्या यशवंतराव सभागृहामध्ये पार पडणार आहे. या निवडणुकीसाठी लातूरच्या अपर जिल्हाधिकारी शिल्पा करमरकर यांची पीठासीन अधिकारी म्हणून नियुक्ती करण्यात आली आहे. तसेच, लातूर जिल्ह्यातील सर्व पंचायत समित्यांच्या सभापती आणि उपसभापती पदांच्या निवडणुका संबंधित पंचायत समितीच्या सभागृहात घेण्यात येणार असून, संबंधित उपविभागीय अधिकारी, तहसीलदार यांची पीठासीन अधिकारी म्हणून नियुक्ती करण्यात आली आहे. या निवडणूक प्रक्रियेसाठी संबंधित पीठासीन अधिकाऱ्यांनी जिल्हा परिषद सदस्य आणि पंचायत समिती सदस्यांना आवश्यक नोटिसा निर्गमित केल्या असून, सर्व सदस्यांनी वेळेवर उपस्थित राहून प्रक्रियेत सहभागी होण्याचे आवाहन सामान्य प्रशासन विभागाच्या उपजिल्हाधिकारी सायली ठाकूर यांनी केले आहे. *****