कपाशीवरील गुलाबी बोंड अळीचे व्यवस्थापन करण्याचे आवाहन
कपाशीवरील गुलाबी बोंड अळीचे व्यवस्थापन करण्याचे आवाहन
लातूर, दि. १९ (जिमाका) : कापूस पिक हे सध्या ५० ते ६० दिवसाचे झाले असून बऱ्याच ठिकाणी फुलावर येत आहे. गुलाबी बोंड अळीचा प्रादुर्भाव डोंमकळ्याच्या स्वरूपात ऑगस्ट महिन्याच्या पहिल्या आठवड्यापासुनच दिसून येत आहे. किटकशास्त्र विभागाच्या चमूने शेतकऱ्यांच्या शेतावर भेटी दिल्या असता, अकोला, वाशिम व बुलढाणा येथील कपाशी जेथे फुलावस्थेत आहे अश्या ठिकाणी डोमकळया आढळून आल्या आहेत. बोंड अळीचा प्रादुर्भाव ५ ते ७ टक्के पेक्षा जास्त आढळून आला आहे. सततचे ढगाळ वातावरण पिकावरील किडींना पोषक असते, किडींचे व्यवस्थापन करण्यास उशिर केल्यास या किडीचा प्रादुर्भाव झपाट्याने वाढण्याची शक्यता असते म्हणुन सुरूवातीपासुनच या किडींचे व्यवस्थापन करून या किडीमुळे होणारे नुकसान बऱ्याच प्रमाणात कमी करता येते. त्यामुळे शेतकऱ्यांनी गुलाबी बोंड अळीचे व्यवस्थापन करण्याचे आवाहन कृषी विभागाने केले आहे.
पिकातील डोमकळ्या नियमित शोधून त्या अळीसहीत नष्ट कराव्यात. दर पंधरा दिवसांनी ५ टक्के निंबोळी अर्काची किंवा अॅझॅडिरेक्टिन ३०० पीपीएम ५० मिली किंवा १५०० पीपीएम २५ मिली प्रति १० ली पाणी याप्रमाणे फवारणी करावी. कामगंध सापळ्याचा वापर करावा. पिकाच्या उंचीनुसार किमान एक फुट उंच अंतर ठेवावे जेणेकरून कामगंध सापळ्याचा प्रभाव वातावरणात पसरण्यास मदत होईल. यासाठी एकरी दोन कामगंध सापळे लावावे. सतत तीन दिवस या सापळ्यामधे आठ ते दहा पतंग आढळल्यास गुलाबी बोंड अळीच्या व्यवस्थापनाचे उपाय योजावेत. तसेच मास ट्रॅपिंग करीता हेक्टरी १५ ते २० कामगंध सापळे लावावेत. पिक उगवणी नंतर ५५ ते ६० दिवसांनी १२ ते १५ दिवसांच्या अंतराने ट्रायकोग्रामा टॉयडीयाबॅक्ट्री किंवा ट्रायकोग्रामा चिलोनिस परोपजीवी मित्र किटकाची १.५ लक्ष अंडी (ट्रायको कार्ड) प्रति हेक्टरी सहा वेळा लावावीत.
गुलाबी बोंड अळीच्या व्यवस्थापनासाठी प्रत्येक आठवड्याला एकरी शेताचे प्रतिनीधीत्व करतील अशी २० झाडे निवडून निवडलेल्या प्रत्येक झाडावरील फुले, पात्या व बोंडांची संख्या मोजून त्यात गुलाबी बोंड अळीग्रस्त फुले, पात्या व बोंडे यांची टक्केवारी काढावी व प्रादुर्भावग्रस्ताची टक्केवारी ५ टक्के पेक्षा जास्त आढळल्यास खाली सांगीतल्याप्रमाणे रासायनिक किटकनाशकाची फवारणी करावी. इंडोक्साकार्ब १४.५० टक्के एससी १० मिली किंवा स्पिनेटोराम ११.७० टक्के एससी ९ मिली किंवा प्रोफेनोफॉस ५० टक्के इसी ३० मिली किंवा क्विनॉलफॉस २० टक्के एएफ २५ मिली किंवा क्लोरपायारीफॉस २० टक्के इसी २५ मिली यापैकी कोणत्याही एका किटकनाशक प्रती १० लिटर पाण्यात मिसळून फवारणी करावी.
जेथे प्रादुर्भाव १० टक्केच्यावर आहे अशा ठिकाणी आवशकते अनुसार प्रादुर्भाव पुढे वाढू नये म्हणून इमामेक्टीन बेन्झोएट १.५ टक्के आणि प्रोफेनोफॉस ३५ टक्के डब्ल्यूडीजी १४ ग्रॅम किंवा सायंट्रानिलीप्रोल ८ टक्के व डायफेनथ्युरॉन ४० एससी १३ मिली किंवा क्लोरपायरीफॉस ५० टक्के व सायपरमेथ्रीन ५ टक्के २० मिली किंवा इमामेक्टीन बेन्झोएट १.१ टक्के व डायफेनथ्युरॉन ३० एससी २० मिली किंवा प्रोफेनोफॉस ५० व फेनप्रोपेथ्रिन ५ टक्के इसी ३० मिली यापैकी कोणत्याही एका मिश्र किटकनाशकाची १० लिटर पाण्यात मिसळून फवारणी करावी.
Comments
Post a Comment